بۇگىن ق ر پرەزيدەنتى جانىنداعى ورتالىق كوممۋنيكاسيالار قىزمەتىندە وتكەن بريفينگ بارىسىندا پارلامەنت ءماجىلىسىنىڭ دەپۋتاتى قۋانىش سۇلتانوۆ قازاقستاننىڭ مەملەكەتتىلىگىنە قاتىستى ايتىلىپ جۇرگەن اڭگىمەگە ءوز پىكىرىن ايتتى. بۇل تۋرالى قازاقپارات جازدى.

دەپۋتات: «شىندىعىندا قازاقستان تاۋەلسىزدىك العان كۇننەن باستاپ، سول تاۋەلسىزدىككە ءدال بىزدەي قۋانعان ەشكىم بولعان ەمەس. ءبىزدىڭ حالىق ءوز الدىمىزعا ەگەمەن ەل بولدىق دەپ قۋانىپ جاتساق، سىرتتاعى جۇرت «بۇلار ەل بولا ما، بولماي ما» دەپ باقىلاي قاراپ، نەشە ءتۇرلى قاق-سوق اڭگىمەلەردى اراعا تاراتتى. ءسۇيتىپ، ەگەمەندىكتىڭ اۋەل باسىنان ايتىلعان اڭگىمەلەر ءالى دە جالعاسىپ كەلەدى. سىرتتاعى ءتۇرلى ساندىراق اڭگىمەنىڭ ارتىنا ىلەسىپ كەتپەۋمىز ءۇشىن ءوزىمىزدىڭ ىشكى ۇلتتىق تۇتاستىعىمىز مىعىم بولۋى كەرەك. ال ءبىزدىڭ ىشىمىزدە ونداي اڭگىمە جوق، وعان جول بەرىلمەيدى دە. جالپى، «قازاقتاردا مەملەكەت بولماعان، ولاردا شەكارا بولماعان» دەگەن اڭگىمە بەكەر. كەرەك دەسەڭىز ارعى عۇنداردان، بەرگى قازاق حاندىعىنان باستاپ، بىزدە شەكارا شارتتى تۇردە قاشاندا بولىپ كەلدى. الايدا،  ونداي شەكارانىڭ كۇشى قاي ۋاقىتتا بولادى؟ ونىڭ كۇشى شەكتەسەتىن كورشى مەملەكەتپەن كەلىسىمگە كەلگەندە جانە ول كەلىسىمدەر بۇۇ-دا بەكىتىلگەندە، شەكارا شارتتى ەمەس زاڭدى بولادى. ياعني، قازاقستاندا بۇعان دەيىن شەكارا بولدى، ءبىراق كەلىسىم بولعان جوق.  ماسەلەن، 1884 جىلى رەسەي مەن جۇڭگو اراسىندا شەكارا سىزىعى ءوزارا جۇرگىزىلدى، وعان قازاقستان قاتىسپادى. نەگە؟ ويتكەنى، ءبىزدىڭ مەملەكەتتىگىمىز بولمادى، رەسەيدىڭ قۇرامىندا بولدىق. سوندىقتان دا، مەملەكەت بولۋ ءبىز ءۇشىن بارىنەن قىمبات، مەملەكەتتىلىكتى كوزدىڭ قاراشىعىنداي ساقتاۋىمىز كەرەك. قازاق مەملەكەتى الىپ كەرۋەن بولىپ ءوز جولىمەن ءجۇرىپ كەلەدى، ءوز داڭعىلىن سالىپ كەلەدى. ماڭگىلىك ەل دەگەن ماقسات جولىنا تۇسكەن كەرۋەنبىز»، - دەپ ءبىلدىردى ءوز پىكىرىن.

قامشى-اقپارات